法國係歐洲美食天堂，鵝肝、血鴨都係馳名美食，其中臨近地中海既馬賽市更被視為美食天堂，最出名菜式係海鮮湯，馬賽除咗擁有全法國最多球迷同最高入座率，仲相當注重飲食，球會酒吧每逢比賽都吸引大量球迷幫襯，另外球會餐廳亦深得球員喜愛，連主將列貝利都讚不絕口。
馬賽九十年代盛極一時，曾擊敗AC米蘭奪得歐冠盃冠軍，球會規模亦相當大，如果論球會配套設施，甚至比五冠王里昂更勝一籌。馬賽除擁有自己球迷專賣店、VIP商務包廂等設施，最具特色算係球會酒吧同埋餐廳。
馬賽酒吧位於舊港，睇晒成個港口景色，酒吧內亦放滿球會紀念品、球員相同埋球衣，每逢電視直播球會賽事，酒吧都相當旺場，顧客當然清一色係馬賽球迷啦，馬賽主場以二比○擊敗勒芒當日，球迷舉杯暢飲慶祝，餐廳自然好生意。
至於馬賽總部既餐廳只供職員同球員享用，菜式甚多，原來列貝利經常來幫襯。餐單方面，除咗要畀營養師同隊醫批准外，每個球員都有自己既飲食習慣，例如列貝利就因為宗教原因唔食豬肉，馬賽呢個「美食天堂」，連球隊都同飲食扯上關係！
